د امریکا ولسمشر ډونالډ ټرمپ له کاناډا سره د سوداګرۍ خبرې ناڅاپه ودرولې، وروسته له هغې چې کاناډا پرېکړه وکړه چې د امریکایي د ټکنالوژۍ شرکتونونو په ډیجیټل خدمتونو مالیه پلي کړي.
د رویټرز راپور راپور له مخې، ټرمپ دا مالیه “یوه ښکاره برید” وبلله او اعلان یې وکړ چې د راتلونکې اونۍ په ترڅ کې به پر کاناډایي محصولاتو نوې تعرفې ولګوي.
دا اقدام د کاناډا له هغې طرحې وړاندې شوی چې غواړي له دوشنبې څخه د امازون، مېټا، ګوګل او اپل په څېر لویو امریکایي ټکنالوژۍ شرکتونو څخه مالیه راټوله کړي.
ټرمپ په خپل Truth Social پلاتفورم کې لیکلي: “دا زموږ پر هېواد یو مستقیم او ښکاره برید دی. کاناډا تل له موږ سره یو سخت تجارتي هېواد پاتې شوی دی.”
هغه زیاته کړه: “د دې ناوړه مالیې پر بنسټ، موږ له همدا اوس څخه له کاناډا سره د سوداګرۍ ټولې خبرې پای ته رسوو. موږ به کاناډا ته په راتلونکو اوو ورځو کې ووايو چې د امریکا سره د سوداګرۍ لپاره به څه ډول تعرفې ورکړي.”
ټرمپ د سپینې ماڼۍ خبریالانو ته وویل چې تر هغه به دا خبرې بیا نه پیلوي څو کاناډا خپل موقف اصلاح نه کړي او ټینګار یې وکړ چې امریکا “پر کاناډا خورا زیات نفوذ لري.”
د ټرمپ له دې اعلان سره سم، د کاناډا لومړي وزیر مارک کارني دفتر ویلي: “د کاناډا حکومت به د خپلو کارګرانو او سوداګرو د ګټو لپاره له امریکا سره دا پېچلي مذاکرات روان وساتي.”
بلخوا، د سپینې ماڼۍ اقتصادي سلاکار بېسنت CNBC ته ویلي چې هڅه کوي دا لانجه کوچنۍ وښيي او وړاندیز یې کړی چې د امریکا د سوداګرۍ استازی جېمېسن ګریر ښايي د کاناډا د ډیجیټل مالیې په اړه د ۳۰۱ مادې له مخې یو تحقیقات پیل کړي. دا څېړنه ښايي د دوو میلیاردو ډالرو د اغېز معادل تعرفوي اقداماتو ته لاره پرانیزي.
د امریکا د احصایې ادارې د معلوماتو له مخې، کاناډا دا مهال له مکسیکو وروسته د امریکا دویم ستر تجارتي شریک دی او د امریکایي صادراتو تر ټولو لوی اخیستونکی هېواد دی. تېر کال کاناډا له امریکا څخه د ۳۴۹.۴ میلیاردو ډالرو محصولات واخیستل او ورته یې ۴۱۲.۷ میلیارد ډالر صادر کړل.
Views: 12
