قطر د ملګرو ملتونو سرمنشي ته په یوه لیک کې د العدید پر اډه د ایران پر توغندیز برید اعتراض کړی خو ایران ټینګار کړی چې دغه «دفاعي اقدام» باید د «دوست او ګاونډي هېواد قطر» پر ضد ونه بلل شي.
پر ایران د اسرائیل له برید او د ایران له متقابلو بریدونو وروسته امریکا د چنګاښ په لومړۍ نېټه د ایران پر اټومي تأسیساتو برید وکړ او تېره شپه ایران په قطر کې د امریکا د العدید پر پوځي اډه توغندیز بریدونه وکړل.
د قطر د بهرنیو چارو وزارت په اعلامیه کې راغلي چې د دغه هېواد حکومت د ملګرو ملتونو سرمنشي ته په یوه لیک کې پر العدید پوځي اډې د ایران د توغندیز برید په اړه غبرګون ښودلی او خبرداری یې ورکړی چې د دغه ډول پوځي اقداماتو دوام کولای شي چې د سیمې او دغهراز د نړۍ ثبات او امنیت له خطر سره مخ کړي.
قطر دغهراز ټینګار کړی چې د ملګرو ملتونو د منشور او د نړۍوالو قوانینو له مخې، د مستقیم غبرګون حق ځان ته خوندي ګڼي.
په یاد لیک کې دغهراز غوښتنه شوې چې ټول پوځي عملیات باید سمدستي ودرول شي او د خبرو اترو بهیر په جدي ډول بېرته پيل شي.
د ایران د بهرنیو چارو وزارت ویاند، اسماعیل بقایي پر خپله اېکسپاڼه لیکلي چې د ایران له لوري په قطر کې د امریکا د العدید پر پوځي اډې توغندیز بریدونه د ملګرو ملتونو د منشور د ۵۱مې مادې له مخې د مشروع دفاع په چوکاټ کې او د امریکا له لوري د ایران پر حاکمیت او ځمکنۍ بشپړتیا د نظامي تېري په غبرګون کې ترسره شوي دي.
نوموړي د العدید پر اډې د ایران د برید په اړه ویلي چې دا «دفاعي اقدام» باید هيڅکله هم د قطر چې یو دوست او ګاونډی هېواد دی، پر ضد ونه بلل شي او ایران له قطر سره خپلو اوږدمهاله او ښو اړیکو ته ژمن دی.
Views: 10
