د اسرائیل د لومړي وزیر دفتر اعلان کړی چې بنیامین نتانیاهو د امریکا د ولسمشر د اوربند وړاندیز منلی او ټاکل شوې د نن ورځې تر پایه یوه اعلامیه خپره کړي.
د راپورونو پر بنسټ، د اسرائیل د لومړي وزیر دفتر اعلان کړی چې د دغه هېواد لومړي وزیر بنیامین نتانیاهو د امریکا د ولسمشر ډونالډ ټرمپ له لوري د اوربند وړاندیز منلی او ټاکل شوې ده چې د نن ورځې تر پایه یوه اعلامیه خپره کړي.
خو د نتانیاهو سیال، لیبرمن پر اوربند نیوکه کړې ده.
د ښي اړخي «یسرائیل بیټنو» ګوند مشر اویګدور لیبرمن خبرداری ورکړی چې د ایران له بشپړ تسلیمېدو مخکې د اوربند ټینګولو هڅه یوه لویه تېروتنه ده.
هغه پر اېکسپاڼه یوه پیغام کې لیکلي: «د ټپي زمري له خوشي کولو هیڅ شی ډېر خطرناک نه دي؛ له شک پرته دغه کار به موږ په راتلونکو دوو یا درېیو کلونو کې یوې بلې جګړې ته بوځي، هغه هم په ډېرو ناوړه شرایطو کې.»
دا په داسې حال کې ده چې د امریکا ولسمشر ډونالډ ټرمپ تېره شپه اعلان وکړ چې د ایران او اسرائیل ترمنځ اوربند به د نن سهار تر شپږو بجو پیل شي، خو د ایران د بهرنیو چارو وزیر ټینګار کړی چې په دې اړه کومه هوکړه نه ده شوې او ایران به د اسرائیل له لوري د سهار تر ۴ بجو د بریدونو درولو په صورت کې، ځوابي برید نه کوي.
د راپورونو له مخې، د ایران پر تهران او ځینو نورو سیمو د اسرائیل او دغه راز پر اسرائیل د ایران بریدونو نن (سهشنبې) د سهار تر څلورو بجو دوام درلود.
د امریکا ولسمشر ډونالډ ټرمپ پر ټولنیزه شبکه «ټروت سوشل» یوه پیغام کې ایران او اسرائیل ته په خطاب کې لیکلي: «اوربند اوس پیل شوی دی؛ لطفاً هغه مه نقضوئ.»
Views: 1
