د بغلان د اطلاعاتو او فرهنګ ریاست مسوولین وایي، د دغه ولایت دوو اوسېدونکو له خپلو نیکونو ور پاتې ۱۴ قلمه لرغوني اثار د لا ښه خوندیتوب په موخه ملي موزیم ته وسپارل.
د بغلان د اطلاعات او فرهنګ ریاست د فرهنګ او ګرځندوی څانګې مسوول مولوي عزت میر حقاني وايي، د دغه ولایت د مرکز اړوند د حسینخېلو کلي دوو اوسېدونکو امانالله او حاجيمحمد د نیکونو له خوا په خپل کور کې ساتلي فرهنګي توکي د لرغوني فرهنګي میراث خوندیتوب په موخه ملي موزیم ته وسپارل.
هغه وایي، په یادو ۱۴ قلمه توکو کې غمي، د اس ریکابونه او د اور بلولو توکي شامل دي چې د هغوی په وینا، ځیني یې له نیکونو ورپاتې د انګریزانو د یرغل د وخت دي.
دغه راز امانالله چې دغه اثار یې د ښه خوندیتوب په موخه د اطلاعات او فرهنګ ریاست ته سپارلي، وايي: «زما د پلار او نیکه د وخت ځیني پخواني توکي چې ۷۳ کاله زما پلار په خپل ژوند خپل کور کې ساتلي، د هغه د نیکه د لاس وو خو دا نه ده معلومه چې هغه به څو کاله ساتلي وي، خو موږ د خپلو فرهنګي میراثونو خوندیتوب په موخه موزیم ته وسپارل.»
هغه وایي، دغه توکي چې د اس ریکابونه، ډېر پخوانی ایشټوب او د سپینو زرو سیکې په کې دي او د خپلې انا د وخت ورسره وې، د ښې ساتنې په موخه یې ملي موزیم ته وسپارلې.
دا په داسې حال کې ده چې دوه میاشتې مخکې هم په دغه ولایت کې دوه زره کاله پخوانۍ سیکو ته ورته اثار موندل شوي وو.
Views: 11
