له ایرانه د افغان کډوالو د را ایستلو لړۍ په چټکېدو سره، یو شمېر راستانه شوي هېوادوال وايي چې په دغه هېواد کې له افغانانو سره ناسم چلند کېږي او ایراني پولیس ترې د را ایستلو پر مهال اضافي پیسې اخلي.
یو شمېر دغه افغان کډوال چې تازه له ایرانه را ایستل شوي او د اسلامکلا بندر له لارې هرات ته راغلي، د ایراني پولیسو له غیرعادلانه او ناسم چلنده شکایت کوي او وايي چې د را ایستلو پر مهال یې د مالونه او پیسو ضبطېدو ترڅنګ، ایراني کارګومارونکي هم له دغه فرصته ناوړه ګټه اخلي او د افغان کارګرانو د مزدورۍ پیسې نه ورکوي.
د پروان د سالنګ ولسوالۍ اوسېدونکي عزیزاقا چې تازه له ایرانه راستون شوی، پژواک ته وویل چې څلور کاله مخکې د بېکارۍ او اقتصادي ستونزو له امله ایران ته کډوالۍ ته اړ شوی و، خو اوس چې له هغه هېواده را ایستل شوی، کارګومارونکي یې هم له دغه فرصته ناوړه استفاده کړې او د څو میاشتو د مزودرۍ پیسې یې چې څه باندې ۶۶ میلیونه ایراني تومان کېږي، نه دې ورکړې.
هغه زیاته کړه: «د معاش ترلاسه کولو لپاره مې له پرلهپسې هڅو سربېره، نه یوازې د کار مالک زما پیسې رانه کړې، بلکې د کډوالۍ له امله یې ګواښ هم راته وکړ.»
هغه ټینګار وکړ چې د یوه کډوال په توګه یې هلته د قانوني شکایت لپاره کومه لار نه درلوده.
د عزیزاقا په خبره، ایراني پولیسو د ایستلو پر مهال د سفر د جواز د لګښت ترڅنګ د کورنۍ د هر غړي پر سر ۴۰۰ زره ایراني تومان په زور ترې اخیستي دي.
بلخوا، د غزني د مالستان ولسوالۍ اوسېدونکی باقر چې له خپلې شپږ کسیزې کورنۍ سره په زور له ایرانه را ایستل شوی، هم د ایراني پولیسو له ناوړه چلند او د هغوی له خوا د اضافي پیسو له اخیستو شکایت کوي.
باقر وايي چې ایراني پولیسو له ده او نورو افغان کډوالو د سفر تر لګښتونو ډېر پیسې اخیستې چې په خبره یې، د قانون له مخې، هر افغان کډوال باید د خپل سفر لپاره ۱.۵ میلیون تومان لګښت ورکړي، خو د ایران پولیسو له دوی د هر لوی او کوچني کس پر سر ۲.۷ میلیونه تومان اخیستي دي.
هغه وويل: «يو شمېر افغان کډوال چې د ايراني پوليسو له لوري نيول شوي وو، د پیسو نه درلودو له امله وهل شوي او دغه راز، پولیسو د دوی د لارې لګښت په زور له نورو کډوالو اخیستی دی.»
د کاپیسا د نجراب ولسوالۍ اوسېدونکی او د هېواد یو مډال ګټونکو لوبغاړی وحیدالله حضرتي وايي چې پنځه کاله مخکې د کار لپاره په غیرقانوني ډول ایران ته ولاړ، خو د هغه په خبره، په دې موده کې یې د کارګرۍ ترڅنګ د سوکوهنې په نړۍوالو سیالیو کې د ګډون له لارې مډال هم ګټلی دی.
هغه وايي، که څه هم د سوکوهنې د یوه اتل په نوم یادیږي، خو د کاري فرصتونو نشتوالي نه یوازې دی، بلکې زرګونه نور ځوانان هم په غیرقانوني توګه کډوالۍ ته اړ کړي دي.
هغه هم په ایران کې له افغانانو سره د ناوړه چلند او د هغوی د ځورونې له امله اندېښمن دی او له حکومته غواړي څو د کډوالو وضعیت ته پاملرنه وکړي.
بلخوا، د هرات اسلامکلا بندر کې د کډوالو او راستنېدونکو چارو د امریت مسوولین وايي چې د دغه بندر له لارې هره ورځ څه باندې څلور زره افغان کډوال په انفرادي ډول یا له کورنیو سره هېواد ته راستنېږي چې ډېری یې په زور له ایرانه را ایستل شوي دي.
د دې ادارې امر عبدالله قيومي پژواک اژانس ته وويل چې حکومتي مسوولین د ځينو نړۍوالو بنسټونو په همکارۍ له نوو راستنېدونکو کډوالو سره د نغدي پیسو او لومړنيو توکو مرسته هم کوي چې په خبره یې، د کورنیو هر غړي ته دوه زره افغانۍ، يو څه خواړه او نور لومړني امکانات ورکول کېږي.
قیومي دغه راز زیاتوي، د افغانستان حکومت هڅه کوي څو د کاري فرصتونو په رامنځته کولو سره بهر ته د ځوانانو او هېوادوالو د غیرقانوني کډوالۍ مخه ونیسي.
د یادونې ده، ایران او پاکستان په جدي توګه د افغان کډوالو د جبري ایستلو لړۍ پیل کړې او هره ورځ زرګونه افغان کډوال له دغو هېوادونو افغانستان ته راستنېږي؛ داسې اقدام چې د افغانستان سرپرست حکومت او د کډوالو ملاتړو سازمانونو څو ځلې له دغو هېوادونو غوښتي څو د افغان کډوالو د په زور ایستلو په اړه پر خپلو پاليسیو له سره غور وکړي.
Views: 1
