اوچا په داسې حال کې افغانستان کې پر بشري پروګرامونو د امریکا د بهرنیو مرستو ځنډولو د منفي اغېزو په اړه راپور ورکړی چې واشنګټن طبیعي پېښو ته د رسېدنې مسوولیت د خپل بهرنیو چارو وزارت د کډوالو برخې ته سپارلی دی.
ډونالډ ټرمپ د لوړې له مراسمو وروسته د یوه اجراییوي فرمان په صادرولو سره د ۹۰ ورځو لپاره د امریکا بهرنۍ پراختیایي مرستې وځنډولې څو بیا کتنه پرې وشي، ټرمپ د امریکا د نړۍوالې پراختیایي ادارې (USAID) د بهرنیو مرستو څه باندې ۹۰ سلنه قراردادونه لغوه کړل چې د شاوخوا ۵۴ میلیارد ډالرو معادل وو.
د ملګرو ملتونو د بشري چارو د همغږۍ دفتر (اوچا) اعلان کړی چې د امریکا د بهرنیو مرستو درېدو افغانستان کې پر بشري پروګرامونو سخت اغېز کړی دی.
اوچا په خپل تازه راپور کې ویلي چې د دغو مرستو په درېدو سره، د توکو زېرمه کولو او د مختلفو پېښو، په ځانګړې توګه طبیعي پېښو لپاره د چمتووالي لړۍ له ستونزو او خنډونو سره مخ شوې ده.
دغه بنسټ لیکلي، د یادو مرستو ځنډېدل په افغانستان کې پر روغتیايي او ماین پاکۍ خدماتو، نغدي مرستو او خوړو وړاندې کولو اړوند پروګرامونو منفي اغېز کړی دی.
رویټرز خبري اژانس تازه راپور ورکړی چې د امریکا د متحده ایالاتو د بهرنیو چارو وزارت په بهر کې طبیعي پېښو ته د رسېدنې مسوولیت چې له دې مخکې د امریکا د نړۍوالې پراختیايي ادارې (USAID) پر غاړه و، د دغه وزارت د وګړو او کډوالو چارو برخې ته سپارلی دی.
په راپور کې راغلي چې د امریکا د بهرنیو چارو وزارت په بېلا بېلو هېوادونو کې خپلو ټولو سفارتونو ته خبر ورکړی څو له طبیعي پېښو سره د مبارزې برخه کې د دغه وزارت د وګړو او کډوالو چارو له برخې سره همکاري وکړي.
په همدې حال کې، د امریکا ولسمشر ډونالډ ټرمپ په خپلو تازه څرګندونو کې ویلي چې د امریکا د نړۍوالې پراختیايي ادارې (USAID) او د هغې د مرستندویه پروګرامونو د بودجې کمښت «ویجاړونکې» اغېزې درلودې.
هغه ویلي: «موږ ډېر لګښت کړی دی، دا یوه لویه ستونزه ده چې په ډېری هېوادونو کې شته. ډېرې ستونزې موجودې دي. تل له متحده ایالاتو پیسې غوښتل کېږي، بل هېڅوک مرسته نه کوي.»
د هغه په وينا، نور هېوادونه هم بايد پيسې ولګوي.
Views: 1
