د راپورونو له مخې، د امریکا په پلازمېنه واشنګټن کې «یهودانو موزیم» ته نږدې د اسرائیل سفارت دوه کارکوونکي په ډزو وژل شوي دي.
الجزیرې راپور ورکړی چې دغه پېښه تېره شپه شاوخوا ۹ بجې په واشنګټڼ ډيسي کې د یهودانو موزیم ته څېرمه شوې ده.
د واشنګټن د پولیسو مشر پاملا سمېت ویلي چې د یادو ډزو په تړاو یې یو شکمن کس نیولی؛ دغه نیول شوی الیاس رودریګز نومیږي، ۳۰کلن او د ایلینوي ایالت د شیکاګو اوسېدونکی دی.
سمېت ویلي چې رودریګز د نیول کېدو پر مهال د «فلسطین ازاد کړئ» شعار ورکاوه.
د متحده ایالتونو د کورني امنیت وزیر کریسټي نوم ویلي چې د یاد برید په اړه یې څېړنې او پلټنې پیل کړې دي.
په همدې حال کې، په ملګرو ملتونو کې د اسراییل سفیر ډني ډانون ویلي، اسراییل ډاډه دی چې امریکايي چارواکي به د دغه برید د عاملانو پر وړاندې پرېکنده اقدامات وکړي.
Views: 5
