هند تېره شپه د پاکستان پر خاوره بریدونه کړي او اسلاماباد هم د ځوابي برید ګواښ کړی، خو له دواړو لورو ملګرو ملتونو او چین د لوړې کچې زغم او امریکا د کړکېچ د ژر پای ته رسولو غوښتنې کړې دي.
د روانې غويي مياشتې په دویمه د هند تر ولکې لاندې کشمیر کې وسلهوالو د ګرځندویانو په یوه مشهور ځای «پهلېګام» کې پر سیلانیانو بريد وکړ چې لږ تر لږه ۲۶ کسان په کې ووژل او ۱۷ نور ټپیان شول.
هند دا برید پاکستان پورې تړلی، خو اسلاماباد هر ډول لاس لرل په کې ردوي، د قربانیانو له کورنیو سره خواخوږي څرګندوي او یاد برید یې د «پهلېګام جعلي عملیاتو» په نوم یاد کړی.
تر یاد برید وروسته د دواړو هېوادونو اړیکې لا ډېرې ترينګلې شوې او پاکستاني چارواکو څو ځله وویل چې هند پر پاکستان د بريد پلان لري.
تېره شپه هندي رسنیو راپو ورکړ چې هندي هوايي ځواک د پاکستان په خاوره کې پر نهو هغو ځایونو بریدونه کړي چې د هغوی په وینا، د «ترهګرو پټنځایونه» په کې دي. هندي چارواکو ویلي چې په بریدونو کې ملکي وګړي او پوځي تاسیسات نه دي په نښه شوي.
د پاکستان پوځ ویلي، هندي الوتکو په دریو ښارونو بهاولپور، کوټلي او مظفراباد بریدونه کړي دي.
بهاولپور د پنجای ایالت او یادې دوې نورې سیمې د پاکستان تر ولکې لاندې کشمیر اړوند دي.
د پاکستان د پوځ ویاند جنرال احمدشریف چودري ویلي، د ترلاسه شوو معلوماتو له مخې، هند په شپږو ځایونو ۲۴ بریدونه کړي چې په دې بریدونو کې اته ملکي وګړي وژل شوي او ۳۵ نور ټپیان دي.
دغه راز، د دغه هېواد د د دفاع وزیر خواجه محمد اصف ادعا کړې چې د پاکستان هوايي ځواک پنځه هندي الوتکې ویشتلي او څو بېپیلوټه الوتکې یې ویجاړې کړې دي.
پاکستان ګواښ کړی چې په خپل وخت کې به هند ته د دغه بريد ځواب ورکړي. د پاکستان لومړي وزير شهباز شریف د چهارشنبې سهار ۱۰ بجې د ملي امنیت کمېټې غونډه رابللې ده او د بلې خوا د پاکستان د پنجاب اعلی وزیرې مریم نواز شریف په ټول پنجاب کې بېړنی حالت اعلان کړی او د پولیسو په ګډون ټولې امنیتي ادارې، د چمتووالي په حالت کې دي.
غبرګونونه
د ملګرو ملتونو سرمنشي انټونیو ګوټرېش ویاند ویلي چې ګوټرېش د هند د یادو پوځي عملياتو په اړه ژوره اندېښنه څرګنده کړې ده. هغه پر دواړو هېوادونو غږ کړی چې د «لوړې کچې له زغمه کار واخلي.»
د راپورونو له مخې، د امریکا ولسمشر ډونالډ ټرمپ د پاکستان او هند ترمنځ د کړکېچ ژر پای ته رسېدو غوښتنه کړې ده.
هغه په سپینه ماڼۍ کې په دې اړه د یوې پوښتنې په ځواب کې ویلي: «دا د شرم خبره ده چې موږ د دې په اړه همدا اوس واورېدل. زه هیله لرم چې دا تاوتریخوالی ژر پای ته ورسېږي.»
د چین د بهرنیو چارو وزارت د هند او پاکستان ترمنځ کړکېچ اندېښمنوونکی بللی دی.
د چین د بهرنیو چارو وزارت ویلي: «هند او پاکستان یو د بل ګاونډیان دي او تل به وي. هغوی دواړه د چین ګاونډیان هم دي. چین د ترهګرۍ له ټولو بڼو سره مخالفت لري. موږ له دواړو لورو غواړو چې د سولې او ثبات په ګټه عمل وکړي، ارام پاتې شي، زغم وښيي او له هغو کړنو ډډه وکړي چې ښايي وضعیت لا پېچلی کوي.»
Views: 4
