د کاناډا لومړي وزیر مارک کارني د امریکا د ولسمشر ډونالډ ټرمپ، سره د سپینې ماڼۍ په لومړۍ مخامخ لیدنه کې ټینګار وکړ چې: «کاناډا هېڅکله د خرڅلاو لپاره نه ده.» دا څرګندونې د ټرمپ له خوا د کاناډا د امریکا ۵۱م ایالت ګرځولو په اړه پرلهپسې ټوکو ته د غبرګون په توګه وشوې.
کارني، چې د ولسمشر ټرمپ خبرو ته له پاملرنې او احتیاطه ډک غبرګون ښود، د لیدنې په یوه برخه کې وویل: «په درنښت، د کاناډایانو لیدلوری په دې اړه هېڅکله نه بدلېږي.»
کارني په څرګنده توګه وویل: «لکه څنګه چې ته د جایداد له نړۍ خبر یې، ځینې ځایونه هېڅکله د خرڅلاو لپاره نه وي — لکه بکنګهم ماڼۍ، سپینه ماڼۍ چې موږ په کې ناست یو، ښایي له همدغو ځایونو وي. ما د ټاکنیز کمپاین پر مهال له کاناډا د اصلي مالکانو سره ولیدل — کاناډا د خرڅلاو نه ده، او هېڅکله به هم خرڅه نه شي.»
کارني دا هم یادونه وکړه چې کاناډا د امریکا د محصولاتو تر ټولو لوی پېرودونکی دی او زیاته یې کړه: «د سوداګرۍ تړون د راتلونکي په اړه لوی بحثونه مخې ته دي.»
ولسمشر ټرمپ د کارني د څرګند رد په ځواب کې وویل: «هیڅکله مه وایاست هېڅکله» او یو ځل بیا یې د دواړو هېوادونو ترمنځ پوله یوه «مصنوعي کرښه» وبلله. هغه دا هم زیاته کړه چې د کاناډا د الحاق موضوع نن نه مطرح کېږي او ورپسې یې ټوکې وکړې: «د ټنګو نڅا ته دوه کسان پکار وي.»
که څه هم ټرمپ د کاناډا سره د دوستۍ پر ارزښت ټینګار وکړ، خو په صراحت یې وویل چې لومړی وزیر (کارني) داسې کوم دلیل نه لري چې د کاناډا پر محصولاتو لګول شوي تعرفې لغوه کړي. «همداسې ده لکه چې ده»، ټرمپ وویل.
دواړو خواوو توافق وکړ چې د امریکا، کاناډا او مکسیکو ترمنځ د ازادې سوداګرۍ تړون (CUSMA) د راتلونکو خبرو لپاره یو بنسټ کېدای شي.
ټرمپ دا تړون «ښه» او «اغېزمن» وباله او کارني ټینګار وکړ: «د امریکا له لوري د تعرفو پلي کول د تړون له اوسني موادو څخه ناوړه ګټه اخیستل دي، نو باید اصلاح شي.»
په دې لیدنه کې، ټرمپ د پخواني لومړي وزیر، جاستین ترودو، او د پخوانۍ نړیوالې سوداګرۍ وزیرې، کریستیا فریلند، انتقاد هم وکړ او فریلند یې «ویرهوړ شخصیت» وباله. دا په داسې حال کې ده چې مارک کارني د لیبرال ګوند د مشرتابه په سیالۍ کې د فریلند سیال هم پاتې شوی او د هغې د یوه ماشوم پلارخواندی هم دی.
ټاکل شوې چې د کاناډا لومړی وزیر نن ماسپښین د امریکا ختیځ وخت له مخې د ماسپښین په درې بجې د کاناډا په سفارت کې له خبریالانو سره خبرې وکړي.
Views: 5
