د کاناډا په ونکوور ښار کې له دې امله ۹ کسان وژل شوي او”ګڼ شمېر” ټپیان شوي چې یوه موټرچلوونکي ناڅاپه موټر د پليو خلکو پر لور ځغلولی او پر ګڼهګوڼه ورغلی دی. دغه پېښه له ځايي وخت سره سم د شنبې ماخوستن له اتو بجو لږ وروسته شوې ده.
ځایي پولیسو ویلي چې د ونکوور په فرازیر سیمه کې د فلیپین د خلکو «لاپو لاپو» نومې کلتوري مېله روانه وه چې موټرچلوونکي ناڅاپه چټک روان موټر د پليو خلکو پر لور وځغلاوه او د خلکو پر ګڼهګوڼه ورغی.
پولیسو د جزئیاتو له ورکولو پرته ویلي چې په دې پېښه کې”۹” کسان وژل شوي او ”ګڼ شمېر” نور ټپیان دي.
هغوی ویلي چې د پېښې په تړاو یو ۳۰ کلن مشکوک سړی نیول شوی دی.
د کاناډا لومړي وزیر مارک کارني پر اېکس یوه پیغام کې د وژل شوو او ټپیانو له کورنیو سره خواخوږي کړې او ویلي یې دي: «د ونکوور لاپو لاپو فيسټیوال کې د وحشتناکو پېښو په اړه له اورېدلو سره ډېر خواشینی شوم.»
د کاناډا بېلابېلو سیاسي ګوندونو او مشرانو هم په دې اړه د خواشینۍ او خواخوږۍ پیغامونه خپاره کړي دي.
Views: 11
