وروسته له هغې چې د هند تر ولکې لاندې کشمیر کې پر ګرځندویانو برید وشو، نوي ډیلي د پاکستان پر وړاندې یو شمېر جدي اقدامات اعلان کړي؛ چې په کې د «واګه بندر» تړل، د سند د اوبو د وېش تړون ځنډول او د پاکستاني ډیپلوماټانو ایستل شامل دي.
دا پرېکړې یوه ورځ وروسته له هغې شوې چې د هند تر ادارې لاندې کشمیر کې د وسلهوالو له خوا پر ګرځندویانو وسلوال برید وشو چې له امله یې ۲۶ کسان وژل شوي او ۱۷ نور ټپیان دي. هند دغه برید له پاکستانه ملاتړ کېدونکو ډلو پورې تړلی او اسلاماباد یې د ترهګرۍ پر ملاتړ تورن کړی؛ خو پاکستان دا تورونه رد کړي.
د بيبيسي د راپور له مخې، هند د دغه برید په غبرګون کې د پاکستان پر وړاندې ځینې اقدامات اعلان کړي چې د دواړو هېوادونو ترمنځ د مهمې سرحدي لارې «واګه بندر» تړل، د سند د اوبو شریکولو تړون ځنډول او د یو شمېر ډیپلوماتانو ایستل په دغو اقداماتو کې شامل دي.
د هند له خوا چهارشنبه په اعلان شوو اقداماتو کې په نوي ډیلي کې د پاکستان سفارت پوځي سلاکارانو ته ویل شوي چې سملاسي ووځي او راتلونکې اونۍ د نورو ډیپلوماټانو د ایستلو پلان هم نیول شوی دی.
همداراز هند د یو شمېر پاکستانیانو ویزې هم لغوه کړې او د دغو ویزو لرونکو ته یې امر کړی چې په دوو ورځو کې له هنده ووځي.
نوي ډیلي همدا راز یو ځل بیا پر پاکستان غږ کړی چې «تر پولې ورهاخوا د ترهګرۍ له ملاتړ» لاس واخلي – هغه څه چې اسلامآباد ترې انکار کوي.
د هند له خوا د پاکستان خلاف اقدامات د هند د لومړي وزیر نرېندرا مودي په مشرۍ د کابینې د مليامنیت اړوند کمېټۍ له غونډې وروسته اعلان شول.
له دې سره د پاکستان حکومت ویلي چې د دوی د ملي امنیت شورا به – چې د هېواد تر ټولو د لوړې کچې پوځي او امنیتي ارګان دی – نن (پنجشنبې) غونډه وکړي.
د پاکستان د لومړي وزیر مرستیال او د بهرنیو چارو وزیر اسحاق ډار ویلي، ډیلي په پهلګام کې د ترهګرۍ د پېښې اړوند څه شواهد نه دي وړاندې کړي او له شواهدو پرته داسې غوسه ښودل د ده په وینا، مناسب نه دي.
د پاکستان دفاع وزیر خواجه اصف بیا جیو ټلوېزیون ته ویلي، اسلاماباد نه غواړي سملاسي غبرګون وښيي.
خواجه اصف په هند کې شوې پېښه د غندلو وړ بللې او ویلي یې دي چې د ترهګرۍ هېڅ راز ملاتړ نه شي کېدای.
د پاکستان بهرنیو چارو وزارت هم د پهلګام له برید وروسته په یوه اعلامیه کې د خواخوږۍ په څرګندولو سره ویلي وو چې «د سېلانیانو د مړینې په اړه اندېښمن دي.»
نوی ډیلی پاکستان په دې سیمه کې د وسلهوالو ډلو پر ملاتړ تورنوي خو اسلاماباد تل دا تور په کلکه رد کړی دی.
دا په داسې حال کې ده چې د افغانستان د بهرنیو چارو وزارت هم دغه برید غندلی او ویلي یې دي چې دغه ډول پېښې په سیمه کې امنیت او ثبات ګواښي.
Views: 0
