د نجونو د زده کړو د ملي کمپاين اعلاميه
د طالبانو د واکمنۍ دوه کاله او له زده کړو څخه د نجونو د محروميت دوام
۱۴۰۲/۵/۲۷
د زمري پر ۲۴مه ( د اګسټ ۱۵مه) د طالبانو واکمني دوه کلنه شوه؛ ډېرې هيلې وې چې ښايي هغه خيالي او ارماني امرثاني له يرغمله آزاد شي او د نجونو پر مخ د علم، رڼا او زده کړې دروازې بيا پرانيستل شي، خو داسې ښکاري چې ثاني امر يوازې يوه حيله ده چې ولس د خپلو لوڼو له مشروع انساني او اسلامي حقونو څخه غافل وساتي.
په تېرو دوو کلونو کې د نجونو پر زده کړو د بنديز لپاره ډول ډول او ضد او نقيض پلمې اختراع شوې، که څه هم ولس د دغو پلمو پر بې منطقي توب او ناسموالي ډاډه و، خو بيا هم تمه دا وه چې ښايي د علم او پوهې مخالفو واکمنانو ته قناعت ورکړل شي چې د ښوونځيو تړلې دروازې بيا پرانيزي، خو له بده مرغه د طالبانو حکومت د پرېکړو واک د يو څو کسانو له خوايرغمل شوی او موږ ګورو چې نه يوازې تړلي ښوونځي خلاص نه شول، بلکې پوهنتونونه او کورسونه هم وتړل شول او داسې وېره شته چې نور بنديزونه به هم پر لار وي.
تاريخ ګواه دی، هر ځل چې په افغانستان کې د خپلواکۍ او پرمختګ فرصتونه پيدا شوي، ورسره د خپلواکۍ پر وړاندې دسيسو هم زور اخېستی او تر ټولو مخکې زموږ له علمي او پوهنيزو بنسټونو سره دښمني پيل شوې ده. په تېرو دوو کلونو کې له عصري علومو او په ځانګړې توګه د نجونو له تعليم سره دښمني د همدغو دسيسو يوه لړۍ ده، چې په لوی لاس او يا هم ناپوهۍ کې د هېواد د خپلواکۍ، ابادۍ او سوکالۍ پر وړاندې پیل شوې ده.
موږ په زغرده اعلانوو، چې د افغان وطن پر لوڼو د زده کړو بنديزونه نور نه يوازې د منلو او زغملو ندي، بلکې تر دې وروسته موږ د افغانستان پر ملي ګټو او د افغان ولس پر حقونو د څرګند تېري په سترګه ورته ګورو او پر وړاندې يې د يوې ملي وجيبې په توګه درېږو.
موږ پر ټولو هېوادوالو او په ځانګړې توګه جيدو ديني عالمانو، درنو قومي مشرانو او پر وطن مين منورينو غږ کوو، چې د هېواد له خپلواکۍ، سوکالۍ او ملي ګټو د دفاع لپاره لاسونه سره ورکړي او د خپلو بچيانو د حقه حقونو لپاره خپل غږ اوچت کړي.
د طالبانو حکومت نجونې د اسلام په نامه او پلمه له زده کړو څخه منع کوي. موږ د اسلامي نړۍ پر ټولو ديني مراجعو غږ کوو، چې که پدې اړه داسې کوم حکم موجود وي چې موږ پرې خبر نه و، نو لطفاً دې دا حکم موږ او ټولې اسلامي نړۍ ته ابلاغ کړي؛ خو که چېرې داسې نه وي، نو اسلامي نړۍ دې نور له دې شرم او پيغور څخه خلاصه کړي. له بده مرغه په لکونو افغانان لدې امله د مهاجرت سخت کړاوونه ګالي، چې لوڼې يې له خپلو انساني او اسلامي حقونو څخه په لوی لاس محرومې شوې دي. موږ براعلی وايو، چې د دې کورنيو د هر ډول مصيبت مستقيم مسئوليت د طالبانو او بيا د اسلامي نړۍ د عالمانو پر غاړه دی.
موږ پر نړيوالې ټولنې هم غږ کوو، چې افغانان هم د بشري کورنۍ غړي دي او د سوکاله انساني ژوند حق لري. جهالت به نه يوازې پر افغانانو د ژوند کړۍ ډېره تنګه کړي، بلکې نړۍ ته به هم درانه ګواښونه پېښ کړي. موږ له نړيوالې ټولنې په کلکه غوښتنه کوو، چې نور د افغانانو د حقونو پر وړاندې بې تفاوتۍ ته د پای ټکی کېږدي او پر هغو لارو چارو اقدام وکړي، چې د افغانانو حقونه پکې خوندي شي.
و ما علينا الاالبلاغ المبين
Views: 24
