د لیبرال ګوند مشر او د کاناډا لومړي وزیر مارک کارني د جمعې په ماښام د سکاربرو (Scarborough) په کمپایني غونډه کې د امریکا په ولسمشر ډونالډ ټرمپ نیوکې وکړې او خبرداری یې ورکړ چې د ټرمپ بېرته راتګ د نړیوال اقتصادي ثبات لپاره یو جدي ګواښ او د کاناډا د ملي حاکمیت لپاره خطر دی.
کارني خپلو ملاتړو ته وویل: «موږ د خپل ژوند تر ټولو ستر کړکېچ سره مخ یو او دا د ولسمشر ټرمپ د غیر عادلانه تعرفو او زموږ پر حاکمیت د هغه د ګواښونو له امله دی. موږ به هېڅکله داسې هڅې ونه منو چې کاناډا کمزورې کړي — چې موږ مات کړي، څو امریکا موږ تر خپل واک لاندې راولي. دا به هېڅکله، هېڅکله و نه شي.»
کارني ځان یوازینی مشر وباله چې د ټرمپ پر وړاندې د درېدو بشپړ چمتووالی لري او د کاناډا پر ځواک، یووالي او زغم یې ټینګار وکړ. هغه ژمنه وکړه چې “د G7 تر ټولو پیاوړی اقتصاد به جوړ کړي — داسې اقتصاد چې د هر کاناډایي لپاره کار وکړي.”
د دې اوونۍ په پیل کې، ټرمپ د نویو پراخو تعرفو اعلان وکړ، چې په کې پر ټولو بهرنیو موټرو ۲۵ سلنه محصول او د ډېرو هیوادونو پر وارداتو ۱۰ سلنه بنسټیز محصول شامل دی. که څه هم کاناډا له دغه بنسټیز تعرفې څخه معاف پاتې شوه، خو اوسني تعرفې لا هم پر کاناډایي فولادو، المونیم، موټرو، انرژۍ او پوټاش (potash) پلي دي.
کارني په غبرګون کې اعلان وکړ چې د امریکا د تولید شوو موټرو پر وارداتو به ۲۵ سلنه تعرفه ولګوي، چې دا ګام یې د “په امریکا کې اعظمي اغېز او په کاناډا کې لږ تر لږه اغېز” لپاره یو دقیقه ستراتیژي بلله.
کارني زیاته کړه: «موږ دا جګړه نه ده پیل کړې، خو کاناډایان تل چمتو وي کله چې نور کسان په دې سوداګریزه جګړه کې دستکشي وغورځوي— لکه د هاکي په میدان کې — موږ به بریالي شو.»
ټاکل شوې د کاناډا فدرالي ټاکنې د اپرېل په ۲۸مه ترسره شي، خو رایه ورکوونکي کولی شي مخکې له وخت نه هم په ځانګړو مرکزونو کې خپلې رایې واچوي.
Views: 2
