د راپورونو له مخې، د امریکا د ولسمشر ډونالډ ټرمپ دولت د نوو بندیزونو د څېړنې په حال کې دی چې د افغانستان په ګډون د ۴۱ هېوادونو د وګړو سفر دغه هېواد ته محدودوي.
رویټرز اژانس د باخبرو سرچینو او یوه داخلي یادښت له قوله راپور ورکړی چې یاد لړلیک کې په ټوله کې ۴۱ هېوادونه په درېيو ډلو وېشل شوي دي.
د راپور له مخې، لومړنيو لسو هېوادونو کې افغانستان، ایران، سوریه، کوبا، شمالي کوریا او نور هېوادونه د ویزو د بشپړ ځنډېدو لپاره ټاکل کېږي.
په دویمه ډله کې به پنځه هېوادونه اریتره، هاییټي، لایوس، میانمار او سوېلي سوډان له جزيي ځنډ سره مخ شي چې پرته له ځینو مواردو، د سیاحتي، زدهکړو او دغه راز د کډوالۍ پر ویزو به اغېز وکړي.
په دغه یادښت کې راغلي، په درېیمه ډله کې ۲۶ هېوادونه شامل دي چې بلاروس، پاکستان، ترکمنستان او نورو هېوادونه په کې راځي.
ورته مهال، یوه امریکايي چارواکي چې نه غواړي نوم یې په راپور کې یاد شي، خبرداری ورکړی چې ښايي په یاد لړلیک کې ځیني بدلونونه راشي او لړلیک تر اوسه د متحده ایالتونو بهرنیو چارو وزیر مارکو روبیو په ګډون د دولت له لوري تایید شوی نه دی.
رویټرز څه موده مخکې هم راپور ورکړی و چې د امریکا د بهرنیو چارو وزارت اړوند د افغانانو د لېږد او مېشتېدنې د دفتر (Care) مسوولینو ته امر شوی څو د سږ کال په اپریل میاشت کې د خپلو فعالیتونو بندیدو لپاره چمتو شي.
Views: 1
