یو شمیر دولتي کارونکي وایي، له تېرو شاوخوا ۵۳ ورځو راهېسې یې خپلې تنخواګانې نه دي ترلاسه کړي، د روژې په میاشت او د اختر د رارسېدو په درشل کې له سختو اقتصادي ستونزو سره مخ دي خو مالیې وزارت وایي چې په دې اړه د خپل مشر امر ته په تمه دي.
د دولتي کارکوونکو د تېرې مرغومې میاشتې معاشونه هم تر شاوخوا ۲۵ شپو وځنډېدل او په ټولنیزو پاڼو کې داسې راپورونه خپاره شول شول چې طالبان د بودجې د کسر له امله نه شي کولای چې د خپلو دولتي کارکوونکو معاشونه ورکړي.
خو د طالبانو ویاند ذبیحالله مجاهد د دغو راپورونو له خپرېدو وروسته د سلواغې میاشتې په ۱۴ مه اعلان وکړ چې د هېواد بودجه داخلي بنسټ لري، د بهرنیو مرستو په کېدو یا نه کېدو پورې تړاو نه لري او د سلواغې میاشتې تر پایه به د ټولو دولتي کاروونکو د مرغومې میاشتې معاشونه ورکړل شي.
طالبانو د مرغومې میاشتې معاشونه په داسې حال کې ورکړل چې هلته یې د سلواغې د معاشونه وخت هم پوره وو.
اوس ۵۳ ورځې کیږي چې بیا د طالبانو مالیې وزارت د سلواغې میاشتې معاش په داسې حال کې نه دي ورکړی چې دا دی د کب میاشتې معاش هم په پوره کېدو دی.
دولتي کارونکي له اقتصادي ستونزو کړیږي
د ارشاد، حج اوقافو وزارت یو کارکوونکی چې نه غواړي نوم یې په راپور کې خپور شي وصال ټلویزیون ته وویل، تر اوسه د سلواغې میاشتې تنخوا نه ده ترلاسه کړي، شېبې شمېرې ترڅو یې تنخوا حواله شي او د خپلې کورنۍ اړتیاووې پرې پوره کړي.
دی وایي: «دولتي کاروونکي خو ډېر فقیر او بېوزله خلک وي، زما ۹۵۰۰ افغانۍ معاش دی، د کور کرایه هم ورکوم، روژه هم ده، نو دا چې وځنډیږي، زه به څنګه چل وکړم.»
هغه زیاتوي چې تر اوسه له له خپلې تنخوا زیاتې له خلکو قرض کړي.
دغه کارکوونکی وایي چې حکومت باید خپلې ستونزې حل کړي او د دولتي کارکوونکو تنخواګانې پر خپل وخت ورکړي ترڅو له ستونزو سره مخ نه شي.
دی زیاتوي چې هره ورځ د خپلې مالیې شعبې ته ورځې د معاش په اړه پوښتنه کوي خو د هغوی ځواب همدا دی چې د مالیې وزارت احوال ته په تمه دي ترڅو د کارکوونکو د تنخواګانو لستونه ورته ولیږي.
په کابل ښار کې یو ترافیک پولیس هم وایي چې دا دی دوه میاشتې په پوره کېدو دي خو دوی لا هم خپلې تنخواګانې نه دي ترلاسه کړي.
دی وایي: «هر ماښام تش لاس کور ته ستون شم، د خپلو ماشومانو له سترګو شرمیږم او را څخه پوښتنه کوي چې پلاره معاش دې نه دی شوی، زموږ معاشونه باید پر وخت راکړل شي، موږ هم مجبور یو، کرایه ورکوو، مصرف لرو.»
هغه زیاتوي چې دوی د خپل ژوند ټولې چارې د همدې معاش سره سمې تنظیم کړي خو که یې یوه اوونۍ یې هم معاش وځنډیږي نو له سختو ستونزو سره مخ کیږي.
په مالیې وزارت کې یوه باوري سرچینه وصال ټلویزیون ته وایي چې دغه وزارت هم په دې اړه له کندهاره د خپل مشر امر ته په تمه دي.
دی وایي، هېڅوک هم په وزارت کې نپوهیږي چې ولې دغه تنخواګانې تراوسه ځنډیدلي خو ټول چارواکو وایي چې د طالبانو مشر باید هدایت وکړي او دوی وروسته له هغې له دولتي ادارو د تنخوګانو لستونه را وغواړي او معاشونه یې ورته اجرا کړي.
Views: 28
