د ننګرهار د اطلاعاتو او فرهنګ ریاست مسوولین وايي، یوه کاناډايي سيلاني چې دغه ولايت ته په سیاحت تللی و، د اسلام مبارک دین قبول کړی دی.
د اېډوارد انډرېس په نوم دغه کاناډايي وګړی چې ۳۷ کاله عمر لري، د اسلام تر قبلولو وروسته ورباندې د محمداکبر نوم کېښودل شوی دی.
د طالبانو د ننګرهار ولایت د اطلاعاتو او فرهنګ رياست د ګرځندوی امر عيدمحمد حنيفي وايي، یاد سیلانی دغه ولایت ته د ورتګ پر مهال، د خلکو د اخلاص، مینې او له اسلامي اخلاقو څخه د متاثره کېدو له امله مسلمان شوی دی.
ورته مهال، د یاد رياست له لوري پژواک خبري اژانس ته په را استول شوې خبرپاڼه کې د تازه مسلمان شوي کاناډايي له قوله راغلي، د افغانانو دیني عقیدې، میلمهپالنې او اسلامي اخلاقو یې زړه ته لاره پیدا کړه او له هغه وروسته یې د اسلام مبارک دین ته د داخلېدو پرېکړه کړې ده.
د یادونې ده چې دې وروستیو کې څو نورو بهرنیو سیلانیانو هم افغانستان ته د سفر پر مهال بېلابېلو ولایتونو کې د اسلام مبارک دین قبول کړی دی.
Views: 5
