د ننګرهار ولايت د مومندرې ولسوالۍ اړوند تورخم ښارګوټي کې د افغان او پاکستاني ځواکونو ترمنځ د جګړې له امله بېځايه شوې کورنۍ د بېړنيو مرستو غوښتنه کوي.
دغه جګړه چې وړمه او تېره شپه په وقفهيي ډول شوې، لومړی پاکستاني ملېشو پيل کړې او د تورخم ښارګوټي سوداګريز او استوګنیز ځايونه يې هم په نښه کړي دي.
که څه هم ځايي خلک وايي چې د جګړو له امله سلګونه کورنۍ بېځایه شوې خو د ننګرهار د کډوالو چارو رياست وايي، د دوی سروې روانه ده او تر اوسه د بېځایه شوو کره شمېر نه دی ترلاسه شوی.
د کورنيو چارو وزارت وياند عبدالمتین قانع وویل چې دغه نښته وړمه شپه ١٢ بجې پیل شوه او د پرون سهار تر ۱۱ بجو روانه وه.
قانع زیاته کړه، یاده نښته د پاکستاني پوځيانو له لوري پيل شوه او د دوی ځواکونه هم اړ شول چې ځواب ورکړي.
د هغه په خبره چې په دې نښته کې «یو مجاهد شهید شوی او دوه تنه ټپيان وو.»
قانع دغه راز وویل چې مقابل لوري ته هم مرګژوبله اوښتې، خو کره شمېره یې نه ده معلومه او د هغوی ځينې پوستې هم ویجاړې شوې دي.
بلخوا، تېره شپه يو ځل بیا پاکستاني ملېشو پر افغان ځواکونو برید کړی او بیا د څو ساعتونو لپاره جګړه شوې ده.
يوې سرچینې پژواک ته وويل چې دغه نښته تېره شپه شاوخوا لس بجې پيل شوه او له يوه ساعت وروسته پای ته ورسېده.
خو سرچینې زیاته کړه چې اوسمهال په تورخم کې جګړه نشته خو دواړه خواوې امنيتي ځواکونه لاس په ماشه ناست دي.
د سیمې خلک وايي چې د جګړې پر مهال پاکستاني ځواکونو د ځايي خلکو کورونه او سوداګريز ځايونه په نښه کړي او خلکو ته يې ډېر مالي زيانونه اړولي دي.
يو ځايي اوسېدونکی احمدالله چې د جګړې له وېرې يې کورنۍ بېځایه شوې او د خپل کور له وضعيته خبر نه دی وايي، بې کوره شوي او بېړنيو مرستو ته اړتیا لري.
دی وايي: «موږ د تورخم نه بېځایه شوي يو، تقریباً څلور څلورنیم سوه کورنۍ بېځايه شوې يو او د سړک پر سر تر باران لاندې پراته يو، حکومتي چارواکو نه زما دا خواهش دی چې موږ سره مرستې وکړي؛ ځکه نه موږ د شپې ځای لرو او نه د سرپناه.»
يوه بل ځايي هټۍوال د نوم نه خپرېدو په شرط پژواک ته وویل چې د جګړې له امله د پاکستاني ځواکونو په ډزو باندې سوداګرۍ ته ډېر زیانونه اوښتي دي.
دی وايي، نه يوازې دا چې سوداګري په ټپه درېدلې، بلکې هټۍ او سوداګريز ځايونه هم د جګړې له امله زیانمن شوي دي.
که څه هم د ننګرهار د کډوالو چارو رييس بازمحمد عبدالرحمن مني چې د جګړې له امله خلک بېځایه شوي خو وایي، دقيق ارقام لا نشته او د سروې ټیمونه به د نن ورځې تر پایه د بېځایه شوو ارقام راټول کړي.
نوموړی وايي: «دا اوس هم موږ لګيا يو ټيمونه ساحو ته لېږو چې سروې وکړي، په ورځ نيمه کې ورته انشاءالله مرستې برابروو.»
خو د کډوالو چارو وزارت وياند عبدالمطلب حقاني وويل چې د دې جګړې له امله شاوخوا ۸۰۰ کورنۍ بېځايه شوې دي.
نوموړی وايي، يادې کورنۍ چې څه د لعلپورې ولسوالۍ د کډوالو په يو لنډمهالي مېشتغالي کې دېره شوي او ځيني يې جلالاباد ښار او نورو ولسواليو ته کډوالې شوې، له هغو سره د مرستو لپاره هڅې روانې دي.
د تورخم دروازې بندېدو او جګړې له مله سوداګري هم زيانمنه شوې ده؛ د ننګرهار د سوداګرۍ خونه وايي چې دواړو خواوو ته پر سوداګریزو توکو بار سلګونه موټرو بند پاتې دي.
د ننګرهار د سوداګرۍ او پانګونې خونې مدیره پلاوي غړي او د ننګرهار يوه سوداګر زلمي عظيمي وويل چې له تېرو شاوخوا ۱۱ ورځو راهيسې چې دروازه تړل شوې چې له امله یې سوداګرو ته هره ورځ ۵۰۰ زره ډالر زیان اوښتی دی.
دی وايي، دواړو خواوو ته د افغان سوداګرو پر سوداګریزو توکو چې اکثریت يې خوراکي توکي دي، سلګونه لارۍ ولاړې دي او د ډېرو لاریو مالونه خراب شوي دي.
د افغان او پاکستاني ځواکونو ترمنځ له دې مخکې هم په ځلونو په تورخم کې ورته جګړې شوې چې زیان يې تر ډېره عامو افغانانو، ناروغانو او سوداګرو ته رسېدلی دی.
Views: 16
