د ننګرهار ولايت د تورخم ښارګوټي کميسار د تورخم لارې د خلاصون اوازې رد کړې او وايي، د لارې د خلاصون په تړاو دوه اړخيزې خبرې شوې دي خو لار تر اوسه نه ده خلاصه شوې.
د تورخم ښارګوټي کميسار ملا عبدالجبار حکمت وايي، نن (د کب ۱۲مه) د افغان او پاکستاني چارواکو له لوري د تورخم په صفري نقطه کې خبرې وشوې او د دواړو لوريو ترمنځ غوښتنې شریکې شوې.
هغه زیاته کړه: «له پاکستاني لوري سره خبرې وشوې، له افغاني لوري د ننګرهار ولایت مرستيال، د ننګرهار د ارتباط خارجه رييس او زه وم، له پاکستاني لوري څخه د پاکستان کميسار او د دوی د قونسلۍ معاون، زموږ تر مابین (ترمنځ) مجلس وشو.»
دی وايي، په دغو مذاکراتو کې د لارې د خلاصون په تړاو خبرې وشوې او خلکو ته د رامنځته شوو ستونزو په تړاو معلومات شریک شول.
دی وايي: «د لارې خلاصون په اړه مو ورته وويل چې لار باید ۲۴ ساعته خلاصه وي، ناروغانو ته باید د تګ پراخه زمینه برابره شي، مسافرو ته به تکلیف نه ورکول کېږي او د راتلونکي لپاره به لار نه بندېږي، د لارې ټرل د ټولو په زیان دی؛ ځکه تجارت او سیاست باید سره جلا وي.»
د ملا حکمت په وينا، پاکستانی اړخ به خپلو مشرانو او دوی به له خپلو مشرانو سره دا موضوعات شریکوي او د دواړو لوريو د هوکړې په پایله کې به دروازه خلاصېږي.
نوموړی له خلکو غواړي چې دروازه تر اوسه خلاصه شوې نه ده او د دوی تر اعلان پورې دې تورخم ته له ورتګ او ځان په تکلیف کولو څخه ډډه وکړي.
د يادونې ده چې د تورخم دروازه شاوخوا نهه ورځې مخکې پاکستاني لوري ډېورنډ فرضي کرښې ته څېرمه د افغان ځواکونو له لوري د تاسيساتو د جوړولو په غبرګون تړلې ده.
Views: 8
