د ننګرهار ځايي چارواکي وايي، د تورخم دروازه نن د درېیمې ورځې لپاره هم د هر ډول تګ راتګ پر مخ تړلې ده.
په تورخم کې د اطلاعاتو او فرهنګ مدیر عرفات مهاجر پژواک خبري اژانس ته وويل چې تورخم لاره نن هم د هر ډول تګ راتګ پر وړاندې د پاکستاني چارواکو له خوا تړل شوې ده.
هغه وويل: «تورخم دروازه نن درېیمه ورځ هم د پیاده مسافرو، مریضانو او سوداګریزو موټرو پر مخ پاکستاني مسوولینو له لوري تړل شوې ده.»
مهاجر له ولسي خلکو او مسافرو هیله وکړه چې د دوی تر خبرتیا پورې دې تورخم ته له تګ راتګ څخه ډډه وکړي.
تورخم دروازه د پاکستاني مسوولینو له لوري درې ورځې مخکې په سیمه کې د افغان چارواکو له لوري د نظامي تاسیساتو د جوړولو په غبرګون کې تړل شوې ده.
Views: 11
