متحده ایالاتو کډوال ماشومانو ته د قانوني مرستو د ځنډولو پرېکړه بدله کړې او یو ځل بیا یې د زرګونو بېسرپرسته کډوال ماشومانو لپاره د قانوني خدماتو وړاندې کولو امر صادر کړی دی.
اسوشیټېډپرېس خبري اژانس د یوه راپور په خپرولو ویلي، د ډونالډ ټرمپ دولت اعلان کړی چې د کډوالو ماشومانو ملاتړي بنسټونه کولای شي زرګونو بېسرپرسته ماشومانو ته قانوني خدمات له سره پیل کړي.
دا پرېکړه وروسته له هغه شوې چې د ټرمپ دولت د تېرو اونۍ د سهشنبې په ورځ د هغو کډوالو ماشومانو لپاره د قانوني مرستو پروګرام وځنډاوه چې د خپلو والدینو یا قانوني سرپرست پرته د مکسیکو له پولې متحده ایالاتو ته تللي دي.
دغه اقدام د کډوالو د حقونو د ملاتړو بنسټونو له سخت غبرګون سره مخ شو او ډېری هغوی له خطر سره د ماشومانو د مخ کېدو خبرداری ورکړ.
دا په داسې حال کې وه چې یاده پرېکړه به پر هغو ۲۶ زره کډوال ماشومان اغېز وکړي چې پرته له خپلو والدینو متحده ایالاتو ته تللي دي.
Views: 3
