د انګلیستان د کرکټ بورډ رییس د اتلانو جام (چمپینز ټرافي) کې له افغانستان سره د لوبې لغوه کولو غوښتنې رد کړې دي.
په دې وروستیو کې د انګلیستان د پارلمان غړو په ګډون څه باندې ۱۶۰ سیاستوالو د دغه هېواد له کرکټ بورډه غوښتي چې د کرکټ اتلانو جام (چمپینز ټرافي) لوبو کې په افغانستان کې د ښځو د حقونو پر وړاندې د «طالبانو» بندیزونو له امله د دغه هېواد د کرکټ له لوبډلې سره له لوبې ډډه وکړي.
د افغانستان د کرکټ ملي لوبډله د کرکټ اتلانو جام (چمپینز ټرافي) لوبو کې چې په روانه فبرورۍ میاشت په پاکستان کې ترسره کېږي، د انګلیستان د کرکټ له ملي لوبډلې سره په ګروپ کې ده او ټاکل شوې چې دواړه لوبډلې د فبرورۍ په ۲۶مه د پاکستان په لاهور ښار کې له یو بل سره مخ شي.
د انګلیستان د کرکټ بورډ رییس ریچارډ ټامپسن د افغانستان له لوبډلې سره د لوبې لغوه کولو په تړاو د غوښتنو په ځواب کې ویلي: «افغانستان د ډېرو خلکو لپاره د هغوی د کرکټ لوبډلې لوبې کتل له ژونده د خوند اخیستو لپاره یوه له په زړهپورې انتخابونو دي؛ نو له دې امله به موږ دا لوبه وکړو.»
هغه زياته کړې چې د کرکټ له نړۍوالې شورا او لوبغاړو سره له مشورې وروسته يې د دې سيالۍ د ترسره کولو پرېکړه کړې ده.
د هغه په خبره، د کرکټ ټولنه په يوازې توګه د افغانستان ستونزې نه شي هوارولای.
دا په داسې حال کې ده چې له دې مخکې د انګلیستان د کرکټ لوبډلې مشر جاوس باټلر هم ویلي وو چې بندیز د حل لاره نه ده او دی پر دې باور دی چې د انګلیستان لوبډله باید په پاکستان کې د تلانو جام سیالیو کې له افغانستان سره لوبه وکړي
Views: 19
