د افغانستان د کرکټ ملي لوبډلې لوبغاړی راشدخان په شلاوریزو لوبو کې د ۶۳۳ لوبغاړو په سوځولو د نړۍ په کچه لومړی توپاچوونکی شو.
راشدخان پر خپله فېسبوکپاڼه لیکلي، د خدای شکر ادا کوي چې په کرکټ کې یې یوه بله کارنامه هم ثبت کړه.
هغه زیاته کړې: «موږ چې هر څه يو، د وطن په نوم یو او هر پرمختګ مو د وطن لپاره دی، خوشحال یم چې په شلاوریزو لوبو کې د نړۍ لومړی بالر شوم چې ۶۳۳ ویکټې مې واخیستې.»
نوموړي د خپلو مينهوالو له دعاګانو او ملاتړه مننه کړې ده.
راشدخان پرون د جنوبي افریقا په شلاوریز سوداګریز لیګ کې د دینټ ویلالاګي په نوم د یوه لوبغاړي په سوځولو سره یاد ریکارډ جوړ کړ.
د معلوماتو له مخې، راشدخان په ۴۶۱ لوبو کې یاد شمېر لوبغاړي سوځولي چې په دغو شلاوریزو سیالیو کې نړۍوالې او سوداګریزې لوبې هم شاملې دي.
د یادونې ده، له راشدخان مخکې یاد ریکارډ د ويسټانډیز پخواني لوبغاړي ډيجي براوو په نوم و چې په ۵۸۰ لوبو کې یې ۶۳۱ کسان سوځولي وو.
Views: 13
