د کډوالو او راستنېدونکو چارو وزارت وايي چې ۹۱ افغانان د پاکستان له زندانونو ازاد او خپل هېواد ته راستانه شول.
یاد وزارت په یوه خبرپاڼه کې ویلي چې یاد شمېر افغانان تېره ورځ هېواد ته راستانه شول.
خبرپاڼه کې د ننګرهار د تورخم او د کندهار د سپینبولدک سرحدي امریتونو له قوله راغلي چې دغه کسان د پاکستان په بېلابېلو سیمو کې د قانوني اسناد نه لرلو له امله نیول شوي وو او له دوو تر ۲۷ ورځو پورې یې بند تېر کړی دی.
سرچینه دغه راز کاږي چې ازاد شوي افغانان د بشري مرستو له ترلاسه کولو وروسته خپلو اصلي سیمو ته ولېږدول شوي دي.
د یادونې ده، د روانې سلواغې میاشتې په پنځمه هم د پاکستان له بندخونو ۶۶ افغان بندیان ازاد او بېرته خپل هېواد ته راستانه شوي وو.
دا په داسې حال ده چې په دې وروستیو کې په پاکستان کې د افغان کډوالو د نیولو او ځورولو پېښې ډېرې شوې دي.
Views: 12
