د امریکا متحدو ایالتونو د هغو افغانانو د ویزو موده دوو نورو کلونو لپاره تمدید کړه چې د جمهوریت تر سقوط وروسته د تخلیې په پروګرام کې دغه هېواد ته تللي دي.
د امریکا د بهرنیو چارو وزارت د معلوماتو له مخې، د۲۰۲۱ زیږدیز کال د اګست په ۱۵مه، د جمهوریت تر سقوط وروسته تر اوسه پورې شاوخوا سل زرو افغانانو ته یې بشردوستانه ویزې کړې دي.
له دغو افغانانو څخه چې تر سقوط وروسته په لومړیو میاشتو کې امریکا ته تللي، د هغوی دوه کلنه ویزه راتلونکو میاشتو کې پای ته رسیږي او دوی د خپل برخلیک په اړه اړه اندېښنه لرله.
د امریکا د کورني امنیت وزارت د پنجشنبې په و رځ یوه نوې پروسه اعلان کړه، چې له مخې یې افغان وګړي کولی شي، خپله مشروطه ازادي، یا لنډمهالې استوګنه تمدید او هلته خپل ژوند او کاروبار ته دوام ورکړي.
سرچینې زیاته کړې، نوې پروسه ساده شوې او لګښت به نه ورباندې راځي او پر شرایطو برابر کسانو ته د دوو کلونو لپاره د مشروطې ازادۍ یا استوګنې د تمدید امکان برابروي.
دا مریکا د کورني امنیت وزارت وايي، افغان وګړي که پر شرایطو برابر وي، هڅول شوي چې په امریکا کې د دایمي استوګنې موقف خپل کړي.
په اعلامیه کې راغلي، هغه افغانان چې بشردوستانه ویزې لری او په امریکا کې یې د پناه غوښتونکي (اسایلم) او يا هم د قانوني حالت د بدلولو (Adjustment of Status) غوښتنليکونه يې لېږلي وي، اړتيا نه لري چي د ري پیرولي (Re-parole) غوښتنليک ډک کړي.
سرچینې زیاته کړې، دغو افغانانو ته د امریکا د کډوالو اداره USCIS به خپله د هغوی ویزه د دوو نورو کلونو لپاره ور وغځوي. همدا راز، د هغوی د کار اجازت کارډ به هم د دوو نورو کلونو لپاره په اوتومات شکل سره تمديد او د هغوی ادرس ته به ور ولېږل شي.
د کورني امنیت وزارت دغه راز ویلي، هغو افغانانو چي تر اوسه يې د اسايلم او يا هم Adjustment of Status لپاره غوښتنليکونه نه دي لېږلي، هغوی کولای شي چې د Re-parole لپاره يا د USCIS اکاونټ له لارې او يا هم غير انلاين بڼه غوښتنليکونه ولېږي.
په اعلامیه کې راغلي، د Re-parole لپاره يوازي يوې فورمې ته اړتيا ده، چي هغه د I-131 فورمه ده. همدا يوه فورمه هم د پرول د تمديدولو لپاره کفايت کوي او هم د همدې فورمې پر اساس د کار اجازت کارډونه تمديدېږي. همدا راز، د دغي فورمې فيس هم په اوتومات شکل سره د مهاجرت د ادارې لخوا معاف کېږي، يعنې تاسي د I-134 فورمې د ډکولو لپاره هم اړتيا نه لرئ.
Views: 1
