د سوریې د انتقالي حکومت مشر احمد شرع ویلي، داسې ټولګډونه حکومت جوړوي څو دغه هېواد کې ازاد او عادلانه ټاکنو ته لار هواره کړي.
رویټرز راپور ورکړې چې د سوریې د انتقالي حکومت مشر احمد شرع پرون پنجشنبه ویلي چې دغه هېواد کې له بېلابېلو ټولنو یو ټولګډونه حکومت رامنځته کوي.
نوموړي زیاته کړې، ادارې به جوړې کړي او هېواد به تر هغه پورې اداره کړي چې ازاد او عادلانه ټاکنې ترسره شي.
احمد شرع دغه خبرې د سوریې د انتقالي حکومت د مشر په توګه تر ټاکل کېدو وروسته د خپلې لومړنۍ وینا پر مهال کړې دي.
دا په داسې حال کې ده چې تېره چهارشنبه د هیئت تحریر شام ډلې مشر احمد شرع د انتقالې دورې لپاره د سوریې د حکومت د مشر په توګه ټاکل شوی دی.
د هیئت تحریر شام او د محمد الجولاني په مشرۍ د بشار اسد دولت مخالفې ډلې د جمعې په ورځ (د لېندۍ ۱۶مه) له دولتي ځواکونو سره له مقاومت پرته د حمص، دیرالزور او درعا ښارونه ونیول او ورپسې د سوريې پلازمېنې دمشق ته ننوتل او پر یاد هېواد یې د اسد کورنۍ څه باندې ۵۰ کلنه واکمني پای ته ورسوله.
Views: 6
