د ننګرهار ځايي چارواکي وايي، د تورخم له لارې پاکستاني چارواکو تېره ورځ يو ځل بیا ۱۹ افغانان راډيپورټ کړي او تورخم کې يې مسوولینو ته وسپارل.
د تورخم چارواکي وايي چې دغو کسانو په پاکستان کې د اوسېدو قانوني اسناد هم درلودل خو بیا هم پوليسو نيولي او له لنډ زنداني کېدو وروسته يې بېرته را ایستلي دي.
په تورخم کې د اطلاعاتو او فرهنګ لوی مدير عرفات مهاجر د مرغومي په ۲۵مه پژواک ته وويل چې تېره ورځ د تورخم له لارې پاکستاني چارواکو ۱۹ افغانان را ډيپورټ کړل.
هغه وويل چې دغو کسانو په پاکستان کې د اوسېدو قانوني اسناد هم درلودل خو پوليسو د پاکستان په بېلابېلو سيمو کې نيولي وو او له دوو څخه تر پنځو میاشتې یې بندیان کړي هم وو.
دی وايي، دغه کسان د کډوالو او انتقالاتو امريت ته سپارل شوي چې زياتره يې د ننګرهار او پاتې يې د نورو ولایتونو دي.
د هغه په وينا، دغه کسان د تورخم مهاجرينو په دفتر کې ثبت، د حقوقي پوهاوي لپاره اېنارسي، د چاودونکو توکو اړوند عامه پوهاوي لپاره ډيارسي او لازمو مرستو ترلاسه کولو لپاره آیاواېم ته ورپېژندل شوي دي.
پاکستان په دې وروستيو کې د افغان کډوالو او مسافرو د نيولو لړۍ بیا ګرمه کړې چې هره ورځ هېواد ته لسګونه کسان را ډيپورټ کوي.
د یادونې ده چې د تېرې یکشنبې په ورځ هم ۴۵ کسان را ډيپورټ شوي وو.
Views: 12
