د افغانستان د کډوالو او راستنېدونکو چارو وزارت وايي، د پاکستان له بندخونو ۲۱ افغان بندیان ازاد او خپل هېواد ته راستانه شول.
د یاد وزارت له لوري نن په خپره شوې خبرپاڼه کې راغلي چې یاد شمېر افغان بندیان تېره ورځ افغانستان ته راستانه شول.
سرچینې د کندهار د سپینبولدک سرحدي امریت له قوله لیکلي چې دغه کسان د قانوني اسنادو نه درلودو له امله د پاکستان په بېلابېلو سیمو کې نیول شوي وو.
سرچینه کاږي، دغه افغان کډوال له یوې تر درېیو میاشتو پورې د پاکستان په بندخونو کې زنداني وو او هېواد ته په راستنېدو سره د همکارو بنسټونو له لوري ورسره بشري مرستې هم وشوې.
د افغانستان د کډوالو او بېرته راستنېدونکو چارو وزارت د معلوماتو له مخې، وړمه ورځ هم د پاکستان له بندخونو ۴۵ افغان بندیان ازاد او خپل هېواد ته راستانه شوي وو.
دا په داسې حال کې ده چې په دې وروستیو کې پاکستان کې د پولیسو له لوري د افغان کډوالو نیول زیات شوي او دا لړۍ دوام لري.
Views: 11
