د راپورونو له مخې، د امریکا په یو شمېر ایالتونو کې د واورې ورېدو او توپان له امله پنځه کسان مړه شوي، له ۲۳۰۰ زياتې الوتنې لغوه او شاوخوا نهه زره نورې ځنډول شوې دي.
بيبيسي راپور ورکړی چې د امریکا په ځينو ايالتونو کې د واورې ورېدو او توپان له امله عادي ژوند ټکنی شوی.
د چارواکو په وینا، ټکزاس، مېسوري، کنساس، وېرجينيا او جنوبي کارولينا کې تر دې مهاله پنځو تنو خپل ژوند له لاسه ورکړی.
د امریکا په اوو ايالتونو کې د بېړني حالت د اعلانېدو ترڅنګ له ۲۳۰۰ زياتې الوتنې لغوه شوې او شاوخوا نهه زره نورې ځنډول شوې دي.
د راپورونو له مخې، لږ تر لږه ۲۰۰ زره کسانو تېره دوشنبې شپه برېښنا نه لرله او د امریکا په شمال ختيځ کې د نورې واورې ورېدو اټکل هم شوی.
د امریکا په اوو ايالتونو کنساس، مېسوري، کنټاکي، وېرجينيا، لوېديځه وېرجينيا، ارکنساس او نيويارک کې د سختو واورو، ساړه او توپان له امله ښوونځي او تعليمي ادارې هم تړل شوي دي.
ورته وخت کې، په امریکا کې شاوخوا ۶۰ ميليونه خلکو ته په دې سړه هوا کې د احتياط خبرداری ورکړل شوی او د واورې له کبله اغېزمن شوو ايالتونو کې له خلکو غوښتل شوي چې په غيرضروري توګه له خپلو کورونو ونه وځي.
د رسمي شمېرو له مخې، تېر کال په جنورۍ مياشت کې د سړې هوا څپې د امريکا اقتصاد ته د ۳،۶ میلیارده ډالرو زيان رسولی و.
Views: 5
