د روغتیا نړۍوال سازمان اعلان کړی چې د تېر مېلادي کال له پیله تر اوسه په افغانستان کې د ماشومانو د ګوزڼ یا پولیو ۲۵ مثبتې پېښې ثبت شوې دي.
دغه سازمان په خپل تازه راپور کې لیکلي چې د ۲۰۲۴ کال له پیله تر اوسه په افغانستان او پاکستان کې د ماشومانو د ګوزڼ ۹۲ مثبت پېښې ثبت شوې چې له ډلې یې ۲۵ پېښې په افغانستان او ۶۷ نورې په پاکستان کې دي.
سرچینې لیکلي چې د پولیو درې تازه پېښې روانه اونۍ په خیبرپښتونخوا، بلوچستان او سند ایالتونو کې ثبت شوې دي.
په همدې حال کې، ۲۰۲۴ مېلادي کال په افغانستان او پاکستان کې د ماشومانو د ګوزڼ د ۹۲ مثبتو پېښو په ثبتېدو سره له هغه د مخکې په پرتله د دې ناروغۍ د پام وړ ډېروالی ښيي.
په ۲۰۲۳ کال کې په افغانستان او پاکستان کې یوازې ۱۲ مثبتې پېښې ثبت شوې وې چې په هر هېواد کې د ماشومانو د ګوزڼ ۶ – ۶ مثبتې پېښې وې.
پولیو یوه ویروسي ناروغي ده چې درملنه یې شونې نه ده او پر دې ناروغۍ د اخته کېدو د مخینوي لپاره یوازینۍ لار ماشومانو ته په منظم ډول د واکسین تطبیق دی.
افغانستان او پاکستان دوه هغه هېوادونه دي چې تر اوس د ماشومانو د ګوزڼ ناروغي پهکې له منځته نه ده تللې.
وموغوښتل په هېواد کې د پولیو د مثبتو پېښو په اړه د افغانستان د عامې روغتیا وزارت نظر هم ولرو، خو بریالي نه شوو.
Views: 4
