ایراني رسنیو د دغه هېواد د سمنان ولایت د یوه چارواکي له قوله اعلان کړی چې د افغان کډوالو په ګډون ټول بهرني اتباع به د ۱۴۰۴ کال تر پایه له دغه ولایت څخه وایستل شي.
د ایران مهر اژانس لیکلي، د سمنان د سیاسي او امنیتي معاونیت سرپرست مهدي اقا برابري د یکشنبې په سهار په سمنان کې د بهرنیو اتباعو د کنټرول او تنظیم په یوه ناسته کې ویلي: «په پلان کې لري چې د ۱۴۰۴ کال تر پایه به له دغه ولایت څخه ټول بهرنیو اتباع راټول کړي.»
هغه ویلي، په څو وروستیو لسیزو کې یو شمېر غیرکډوال افغانان په ډلهییزه توګه او پرته له کومې برنامې دغه هېواد ته تللي او په بېلابېلو برخو کې یې ستونزې رامنځته کړې دي.
هغه وویل، له سمنان څخه د ټولو بهرنیو اتباعو راټولونه د ۱۴۰۴ کال تر پایه پلان شوې ده او زیاته کړې یې ده چې د افغان کډوالو غیرقانوني شتون پر یوې داسې موضوع بدل شوی چې باید ژر تر ژره یې په اړه پرېکړه وشي.
هغه په سمنان کې د افغان وګړو ته د خدمتونو محدودولو برخه کې اقداماتو ته په اشاره ویلي: «د جایدادونو مشاورین له یادو کسانو سره د همکارۍ حق نه لري او د سرغړونې په صورت کې به له سخت چلند سره مخ شي.»
هغه زیاته کړې، د ایران او افغانستان پر پوله څه باندې ۴۵۰ کیلومتره دېوال جوړ شوی، دا لړۍ روانه ده او باید دې موضوع ته جدي پاملرنه وشي څو د یادو خلکو د بیا واردېدو مخه ونیول شي.
هغه نه دي ویلي چې په سمنان کې څومره افغانان اوسېږي.
ایراني چارواکو مخکې له دې ویلي وو چې په ایران کې شاوخوا پنځه میلیون افغان کډوال اوسېږي چې څه باندې درې میلیونه یې د کډوالۍ اسناد لري.
Views: 9
