د جرمني په پلازمېنه برلین کې د افغانستان سفیر او د دغه هېواد په بن ښار کې د افغانستان کونسل له خپلو دندو استعفا کړې ده.
د جرمني په پلازمېنه برلین کې د افغانستان سفیر یما یاري له خپلې دندې استعفا کړې ده.
هغه د يوې اعلاميې په خپرولو سره ويلي چې د رامنځته شوي وضعيت په پام کې نيولو سره د کوربه هېواد سياسي موقف او د هغوی غوښتنې ته په کتو له خپلې دندې استعفا کوي.
ده زياته کړې: «په وروستيو مياشتو کې د اروپا او نړۍ په ځينو برخو کې د افغانستان د يو شمېر استازوليو له خوا د کونسلي اسنادو د طی مراحلو بهير د کابل د رسمي تعامل د نشتوالي له امله له اساسي ستونزو سره مخ شوی دی.»
ياري ويلي چې د سفارت چارې په رسمي ډول «خپلو همکارانو» ته سپاري.
د راپور له مخې، د جرمني په بن ښار کې د افغانستان کونسل، سید لطفالله سادات هم له خپلې دندې استعفا کړې ده.
سادات ويلي چې د کوربه هېواد په غوښتنه او په کونسلي فعالیتونو کې د ځنډ او يا د هغو د بندېدو د مخنيوي په موخه یې دغه ګام اوچت کړی.
خو طالبانو او جرمني تر اوسه په دې اړه څه نه دي ویلي.
Views: 11