د ملګرو ملتونو د بشري مرستو همغږیکوونکي دفتر (اوچا) د اقلیمي بدلون له نړۍوال کنفرانسه غوښتي څو له هغو ټولنو سره پر مرستو تمرکز وکړي چې له لوړې تودوخې او وچکالۍ سره مخ دي.
اوچا نن پر خپله اېکسپاڼه لیکلي، افغانستان په داسې حال کې د اقلیمي بدلون له اړخه د نړۍ تر ټولو زیانمنو لسو هېوادونو دی چې د نړۍ یوازې صفر عشاریه یو سلنه شینکوریز ګازونه تولیدوي.
سرچینه زیاتوي چې د ملګرو ملتونو د اقلیمي بدلون نړۍوال کنفرانس (COP-29) کې باید بیړني اقدامات وشي څو هغه ټولنې ملاتړ ترلاسه کړي چې له سختې تودوخې، د اوبو کموالي او وچکالۍ سره مخ دي.
دا په داسې حال کې ده چې تېره ورځ د افغانستان د چاپېریال ساتنې ملي ادارې مشر مولوي مطیعالحق خالص، د یوه تخنیکي پلاوي په مشرۍ یاد کنفرانس کې د ګډون په موخه اذربایجان ته تللی.
دغه کنفرانس نن پیلېږي او د روانې نومبر میاشتې تر ۲۲مې د اذربایجان پلازمېنه باکو کې دوام لري.
د نړۍ د ډېر شمېر هېوادونو مشران، د چاپېریال ساتنې وزیران او متخصصین په دغه کنفرانس کې ګډون کوي.
د افغانستان د چاپېریال ساتنې ملي ادارې ویلي چې افغان پلاوی به په دغه کنفرانس کې د چاپېریال ساتنې او اقلیمي بدلون برخه کې له نړۍوالو سره د همکارۍ د پیاوړتیا، د اقلیمي بدلون په برخه کې موجوده مالي میکانېزمونو ته د افغانستان د لاسرسي او اقلیمي بدلون سره د سازش او مبارزې په تړاو له نړۍوالو سره خپلي غوښتني شریکې کړي.
Views: 10
