«بریالۍ څېرې» خپرونه کې مو دا ځل په جرمني کې افغان محصله صفیه حسني مېلمنه ده.
صفیه حسني په ۲۰۰۳ میلادي کال کې په کابل ښار کې زېزیدلې ده، ۳ کلنه وه چې له افغانستانه د چک جمهوریت ته کډواله شوه.
لومړنۍ او منځنۍ زدهکړې یې تر نهم ټولګي پورې د چک په جمهوریت کې کړې دي، وروسته یې کورنۍ جرمني تللې او په ۲۰۲۴ زېږدیز کال کې په دغه هېواد کې له کالجه فارغه شوې ده.
که په افغانستان کې د نجونو پر مخ د پوهنتونونو دروازې بندې دي خو حسني د ازموینې له لارې په خپله وړتیا د لندن ښاري پوهنتون (Queen Mary University of London) د حقوقو پوهنځي ته بریالۍ شوې ده .
صفیې یاد پوهنځی د دې لپاره انتخاب کړی چې د افغانستان د ښځو او ماشومانو د حقونو ترلاسه کولو په موخه د مبارزې لپاره خپله علمي کچه لوړه کړي.
هغه د ښځو او ماشومانو د حقونو فعاله ده او د افغانستان د ماشومانو غږ وچتولو لپاره یې د ملګرو ملتونو په مهمو کنفرانسونو کې ګډون کړی دی .
نوموړې په پښتو، دري، انگلیسي، چکي، الماني، سلواکي او هسپانوي ژبو روانې خبرې کولای شي.
Views: 125