د افغانستان کرکټ بورډ وایي چې د هېواد الف لوبډله د ایمرجېنګ اسیا جام سیالیو کې د ګډون په موخه نن عمان ته لاړه.
د افغانستان کرکټ بورډ ویلي چې افغان ابدالیان د «افغانستان الف» کرکټ لوبډله نن سهار عمان ته روانه شوه.
سرچینې زیاته کړې، افغان لوبډله به د عمان پر وړاندې د دوه تمریناتي سیالیو ترڅنګ د عمان او هانګکانګ له الف لوبډلو سره درې اړخیزه لوبلړۍ هم ترسره کړي.
همدارنګه دغه درې اړخیزه لوبلړۍ به د روانې اکتوبر میاشتې له ۱۳مې تر ۱۵مې پورې ترسره شي.
کرکټ بورډ زیاته کړې، دغه راز به افغان ابدالیان لوبډله په درې اړخیزه لوبلړۍ کې له ګډون وروسته په ایمرجېنګ اسیا جام سیالیو کې هم برخه واخلي چې د اکټوبر میاشتې په ۱۸مه به په عمان کې پیل شي.
دغه راز، کرکټ بورډ د یادو سیالیو لپاره د افغان الف لوبډلې نوملړ هم تېره شپه اعلان کړ.
همدارنګه په دغه نوملړ کې دروېش رسولي لوبډلمشر، صدیق اتل، زبید اکبري، نعمان شاه، وفيالله ترهخېل، شاهدالله کمال، محمد اسحاق، شرفالدین اشرف، ننګیال خروټی، کریم جنت، قیس احمد، اللهمحمد غضنفر، فریدون مومند، عبدالرحمن او بلال سمیع شامل دي.
دغه راز، په یاد نوملړ کې سلیم صافی، صدیق پاچا، بشیراحمد افغان او حسن عیسیخېل د احتیاطي لوبغاړو په توګه اخیستل شوي دي.
د یادونې ده چې د افغانستان الف لوبډله به د روانې اکتوبر میاشتې په ۹مه او لسمه له عمان سره دوه تمریني شل اووریزه لوبې ترسره کړي.
Views: 11
