د امریکا متحده ایالتونو په کلیفورنیا ایالت کې د یوې الوتکې لوېدو پېښه کې شپږ کسان مړه شوي دي.
ځایي چارواکي وایي، دا الوتکه د کلیفورنیا ایالت د موریتا ښار له یوه هوایي ډګر سره نږدې لوېدلې چې د لاسانجلس او سان ډیاګو ښارونو ترمنځ پروت هوایي ډګر دی.
پولیسو ویلي، د دې الوتکې تر لوېدو وروسته د اور لمبې دومره شدیدې وې چې تقریباً یو هکتار ځمکه یې سوځولې ده.
د امریکا غږ خبر له مخې، دا الوتکه د لاس ویګاس نړۍوال هوایي ډګره الوتې وه او په سیمهییز وخت شنبې وختي ولويده.
د امریکا هوایي چلند فدرالي ادارې ویلي، الوتکه Cessna C550 جیټ وه چې معمولاً د سوداګریزو پروازونو لپاره ترې کار اخیستل کېږي او لږ شمېر خلک پکې ځایږي.
د سیمې د اور وژنې ادارې معلوماتو له مخې، په الوتکې کې ټول شپږ کسان سپاره و او د اوروژنې عملې تر ور رسېدو شپږ واړه سوځېدلي او مړه و.
تر اوسه په الوتکه کې د مړه شوو د پیژندګلوۍ په هکله څه نه دي ویل شوي.
د هوایي چلند فدرالي ادارې او د ملي ترانسپورټ خوندیتوب ادارې ویلي چې د پېښې په هکله پلټنې کوي.
دا په دې تېرو څو ورځو کې دویمه الوتکه ده چې په دې سیمه کې لوېږي؛ یوه بله الوتکه هم د همدې تېرې سې شنبې په ورځ له هوایي ډګر سره نږدې له یوې ودانۍ سره وجنګېده او یو تن پکې ووژل شو.
Views: 5
