د کاناډا په ټورنټو ښار کې مېشتو افغانانو د افغانستان د خپلواکۍ بېرته اخیستو ۱۰۵ کالیزه په مناسبت په موټریز کاروان کې چې ملي بیرغ یې په لاسونو کې و، د ټورنټو ښار د نارټ یارک بېلابېلو سیمو کې وګرځېدل او د وطني سندرو غږولو ترڅنګ یې ملي اتڼوڼه وکړل.
د دغه جشن یو تنظیموونکی بهرام بهير وايي، د افغانستان د خپلواکۍ ۱۰۵ کالیزه یې دلته په مېشتو افغانانو کې د ملي او افغاني روحیې پیاوړې کولو، له وطني ارزښتونو سره د هغوی د مینې پیدا کېدو او دغه راز د کاناډا په متنوع ټولنه کې د افغانانو کلتوري او ټولنیز شتون د څرګندوالي په موخه ونمانځله.
نوموړي دغه راز وویل، دغه ډول ملي نمانځنې او پروګرامونه کولای شي دلته د مېشتو افغانانو ترمنځ یووالی رامنځته کړي او د هغوی ماشومان له خپلو ملي ارزښتونو او کلتور سره اشنا کړي.
د یادونې ده، د خپلواکۍ د نمانځنې په دغه جشن کې د پښتو او دري ژبو ترڅنګ په پشهيي ژبه هم سندرې وغږېدې او د دې ورځې مبارکي پرې ورکړل شوه.
Views: 7
