راپورونه وایي چې په اروپایي هېواد سویډن کې د اېم پاکس په نوم ناروغۍ د خطرناکې بڼې لومړنۍ پېښه ثبت شوې ده.
دغه پېښه په سويډن کې په داسې حال کې ثبتیږي چې پرون د روغتیا نړۍوال سازمان (ډبلیواېچاو) د افریقا په ځینو برخو کې د اېمپاکس ناروغۍ د خپرېدو له امله بېړنی حالت اعلان کړی و.
بي بي سي د سویډن د عامې روغتیا چارواکو له قوله ویلي، هغه کس چې پر دې ناروغۍ اخته شوی، د افریقا په هغه سیمه کې اوسېدلی چې د یادې ناروغۍ کلېډ ۱بڼه په کې خپره شوې.
د سویډن د عامې روغتیا ادارې زیاته کړې، د دغې ناروغۍ له دوو(کلېډ۱، کلېډ۲) بڼو څخه کلېډ۱یې معمولاً په کورونو کې د کورنۍ غړو تر منځ خپرېږي چې ماشومان یې ژر ښکار کېدای شي.
اېمپاکس ناروغي چې پخوا د منکي پاکس [د بیزو چیچک] په نوم پېژندل کېده، ژر لېږدېدونکې ده چې د ډبلیواېچاو د معلوماتو له مخې، تراوسه یې په افریقا کې له امله ۵۰۰ کسان مړه شوي او ۱۷ زره نورې پېښې ثبت شوې دي.
تېره ورځ د روغتیا نړیوال سازمان مشر ټیډروس اډانوم ګېبریېسوس ویلي و: «د دې ناروغۍ د مخنیوي او د انسانانو د نجات لپاره نړۍواله همغږي اړینه ده.»
هغه زیاته کړې وه چې په افریقا او له دې وچې بهر د یادې ناروغۍ د نورې خپرېدا شونتیا د زیاتې اندېښنې وړ ده.
د روغتیا نړۍوال سازمان د معلوماتو له مخې، د اېمپاکس ناروغي له اخته کس سره د پوستکي تماس، له نږدې د خبرو او تنفس له لارې لېږدول کېږي او د والګي په څېر د نښو نښانو او پوستکي د ټپونو لامل کېږي چې پر دې ناروغۍ له هرو سلو اخته کسانو شاوخوا څلور یې ژوند بایلي.
Views: 9
